Heller end i Kiste samle Guld,saml du din Hjerneskal fuld!

Se flere sitater

SvaleLønnetre om våren
Hestehov (leirfivel)Blåveis
Foto (øverst fra venstre) / Govva (bajimuččas gurutbealde) : Mark Goldman / iStockphoto, Janet Forjan-Freedman / iStockphoto, Trygve Strømstad / ScanStockPhoto, Vaida / ScanStockPhoto
Giđđa! Giđđa! Gájo mu!
Ii oktage leat du njuorrasebbo ráhkistan go mun.
Du vuosttas sitnu lea mávssolebbo go čábbámus smarágda.
Du anemonaid mun gohčodan jagi čikŋan,
vaikko bures dieđán ruvssuid lieđđuma lahkaneamen.
Hálljagasat vigge mu dávjá giellat.
Lei dego prinsessaid ráhkisin iežas dovdat.
Muhto mun báhtarin: Anemonii, Ruona niidii, mun oskkáldas.
De vihtanuša, Anemona, gean ovdii vilššagit čippastin!
Vihtanin badjelgehččojun uvlolieđđi ja vuodjarássi,
din árvvusatnen eanet go golli, go giđa mánát han lehpet dii!
Vihtanuša spálfu, ahte du guossohin dego ruoktut máhcan
čádjidan máná, danin dušše go giđa áirrasin atnen du.
Oza dáid balvvaid hearrá ja áno sus ahte ii šat gilvvášii náluid
mu raddái daid galbma alit rahpasemiin.
Vihtanuša don, boares muorra, gean ipmilláhkai lean bálvalan,
ja man urbbiid juohke giđa viššalebbo go bearraliid lean logadan!
Vihtanuša don, gean nu dávjá lean salastan
máttarmáná máttarádjá gudnejahttimiin.
Man dávjá leaččan ge sávvan leat nuorra váđir
du jámekeahtes ruohttasis mu gierraga duinna seaguhit!
Vuoras, vihtanuša don mu ovddas! Dutnje luhttet.
Don han leat boaris ja árvvusadnojuvvon dego patriárka!
Rohkadala mu ovddas, de mun goaikalahtán viinni du ruohttasiidda
ja dálkkodan du háviid cummáin.
Du kruvdnu várra jo čábbámus čuvgesruonán,
du lasttat jo šuvvet dieppe olgun.
Giđđa! Vuoras čuorvu mu, vaikko lea ge jietna siđđon.
Son geige gieđaidis almmi guvlui, ja anemonat,
du alitčalmmat mánát, čippostit ja rohkadallet ahte don
beasttášit mu – mu, gii ráhkistan du nu njuorrasit.
Jorgalan ja heivehan davvisámegillii Harald Gaski

Gro Roksand, 28. mars 2008 | Skriv ut siden